Hikmət Hacıyevdən diqqətçəkən müsahibə | Ermənistan və ABŞ ilə əlaqələr barədə vacib açıqlamalar

“Mərkəzi və Şərqi Avropa ölkələri, xüsusilə Slovakiya və Çexiya Azərbaycanın etibarlı tərəfdaşlarıdır. Enerji sahəsində əməkdaşlıq bu əlaqələrin əsasını təşkil edir”.

Azərbaycan Prezidentinin köməkçisi, Xarici siyasət məsələləri şöbəsinin müdiri Hikmət Hacıyev Slovakiya qəzetinə müsahibəsində belə deyib.

Prezidentin köməkçisi bildirib ki, Azərbaycan qazı hazırda Avropanın 8 ölkəsinə birbaşa, 12 ölkəyə isə dolayı yolla çatdırılır. Slovakiya artıq Azərbaycan qazını idxal edir və Bakı bu həcmləri artırmağa hazırdır.

H.Hacıyev əlavə edib ki, “yaşıl fanatizm” kənara qoyulmalı, enerji keçidi isə realist və mərhələli şəkildə həyata keçirilməlidir.

“Realist olmalıyıq. Bu gün sadəcə qaza real alternativ yoxdur. Bu, “yaşıl enerji”yə keçid prosesində də əsas komponentdir”, ‒ deyə Hikmət Hacıyev bildirib.

Rusiya-Ukrayna müharibəsinə toxunan Prezidentin köməkçisi Azərbaycanın münaqişəyə hərbi şəkildə qarışmadığını, yalnız humanitar yardım göstərdiyini bildirib.

Onun sözlərinə görə, Azərbaycan həm Rusiya, həm də Ukrayna ilə tarixi dostluq münasibətlərini qoruyur.

Azərbaycan-Ermənistan münasibətlərinə gəlincə isə o bildirib ki, artıq müharibə yoxdur, sülh və sabitlik hökm sürür. Sülh sazişi üzərində iş aparılır, lakin Ermənistanın konstitusiyasında dəyişiklik vacibdir.

ABŞ ilə münasibətlərin Tramp administrasiyası dövründə canlandığını vurğulayan Hikmət Hacıyev Avropa bazarında SOCAR-ın rolunu və Avropa qanunlarına hörmətlə yanaşmasını da qeyd edib.

Sonda isə o, Slovakiyanın hərbi-sənaye potensialının Azərbaycanla müdafiə sahəsində əməkdaşlıq üçün perspektivlər yaratdığını bildirib.