İran Rusiya və Çinlə hansı gizli danışıqları aparır?

Çin, Rusiya və İran BMT sanksiyalarını açıq şəkildə pozaraq ballistik raketlərin daşınmasında istifadə olunan əsas kimyəvi maddənin tədarükü üçün gizli danışıqlar aparır.

Bu barədə “Politico” nəşri diplomatik mənbələrə istinadən məlumat yayıb. Bildirilib ki, Tehran raketləri gücləndirmək üçün istifadə olunan bərk yanacağın əsas tərkib hissəsi olan külli miqdarda ammonium perkloratın əldə edilməsi üçün hər iki ölkənin rəsmiləri və hökumətin nəzarətində olan qurumlarla, o cümlədən Rusiyanın dövlət kimya istehsalçısı “FKP Anozit”lə paralel danışıqlar aparır.

Məlumata görə, Tehranın Çində və daha geniş regionda texnologiyalar üzrə müşaviri olan iranlı diplomat Səccad Əhədzadə Pekində yanacaq əldə etmək üçün danışıqlara rəhbərlik edib.

Danışıqlarda hansı Çin şirkətlərinin iştirak etdiyi və İranın əldə etmək istədiyi ammonium perkloratın dəqiq miqdarı bəlli deyil. Lakin ekspertlər hesab edirlər ki, bu, minlərlə raketin, xüsusən də 700 kilometr mənzilli və istifadə olunan “Zülfüqar” raketinin istehsalına kifayət edəcək.

Analitiklərin fikrincə, İran kosmos proqramları adı altında daha uzaqmənzilli raketlər hazırlamaq üçün də məhz bu yanacaqdan istifadə edir. Həmçinin razılıq əldə olunarsa, bu raketlərdən bəziləri Ukraynaya qarşı yerləşdirilə bilər.

Qeyd edək ki, BMT-nin 2015-ci ildə qəbul etdiyi qətnaməyə əsasən Təhlükəsizlik Şurasının təsdiqi olmadan İrana ammonium nitrat verilməsi qadağan edilib.