İran Zəngəzur dəhlizinin açılmasına mane olub, yoxsa...? | Dəhlizin region üçün əhəmiyyəti

İran Zəngəzur dəhlizinin açılmasına qarşı çıxdığını bir daha etiraf edib.

Bu barədə İranın ali rəhbəri Seyid Əli Xameneinin beynəlxalq məsələlər üzrə müşaviri Əli Əkbər Vilayəti “Tasnim” agentliyinə açıqlamasında bildirib.

İran rəsmisi anti-Azərbaycan mövqeyinə haqq qazandırmaq üçün qeyd edib ki, Zəngəzur dəhlizinin açılmasında əsas məqsəd guya İranın Avropaya çıxışını məhdudlaşdırmaqdır.

Vilayəti iddia edib ki, ABŞ-nin sabiq prezidenti Co Bayden dəhlizi işə salmaq istəyib, lakin İran layihənin həyata keçirilməsinə mane olub. Vilayətinin açıqlaması geosiyasi baxımdan əsasız və şişirdilmiş bir ideyadır. İranın Ermənistan və Gürcüstan vasitəsi ilə Avropaya çıxışı var. Yəni Zəngəzur dəhlizi bunun qarşısını kəsmir. İranın dəhlizə qarşı çıxmasının isə əsl səbəbi başqadır.

Birincisi, bu layihə Azərbaycan-Türkiyə birliyini möhkəmləndirəcək. İkincisi, dəhliz Türkiyəni türk dünyasına daha da yaxınlaşdıracaq. Bu, İranın uzunmüddətli geosiyasi maraqlarına cavab vermir. Üçüncü bir məsələ isə ondan ibarətdir ki, İran Ermənistan bazarını əldən vermək istəmir. Dəhlizin açılması Azərbaycan və Ermənistan arasında iqtisadi əlaqələri gücləndirə bilər ki, bu da Tehranın maraqlarına cavab vermir.

Xameneinin müşaviri məsələdə Co Baydenin rolunu bilərəkdən şişirdib. Görünür, İran Baydenin bütün qərarlarına qarşı çıxan Trampdan dəstək istəyir. Həmçinin keçmiş baş diplomat prezidentlik həvəsinə düşüb. Halbuki 2013-cü ildə Həsən Ruhani birinci, Vilayəti isə axırdan birinci olub. İndi isə o, islahatçı qanaddan olan Prezident Məsud Pezeşkianın qarşısında mühafizəkarların əsas namizədinə çevrilmək niyyətindədir.

İrandan səslənən fikirlərə rəğmən, cənubda da çox yaxşı bilirlər ki, Zəngəzur dəhlizinin gələcək taleyi İrandan yox, Azərbaycan, Türkiyə və Ermənistandan asılıdır.