İrandan səfirliyimizə hücum edən şəxslə bağlı açıqlama

Azərbaycanın İrandakı səfirliyinə hücum edən şəxsin işi ilə bağlı məhkəmənin hökmü tezliklə elan olunacaq.

Bu barədə İran Xarici İşlər Nazirliyinin sözçüsü Nasir Kənani mətbuat konfransında deyib.

O bildirib ki, hakimin sözlərinə görə, yaxın vaxtlarda hökm çıxarılacaq. Nasir Kənani bir neçə gün öncə Azərbaycan səfirliyinə hücum edən şəxsin məhkəməsinin keçirildiyini xatırladıb.

XİN rəsmisi vurğulayıb ki, İranın məhkəmə orqanları ittihamlara qanun çərçivəsində baxacaqlarına əmin ediblər. İki ölkənin ədliyyə orqanlarının əməkdaşlığı ilə istintaq prosesi yekunlaşıb.

N.Kənani bildirib ki, hadisə iki ölkənin münasibətləri üçün acı olsa da, hakimiyyət bunun əlaqələrə təsirini minimuma endirmək üçün çox çalışıb.

“İki ölkənin yol xəritəsinə uyğun olaraq, son bir ildə biz müxtəlif sahələrdə nümayəndə heyətlərinin mübadiləsinin şahidi olduq. Ümid edirik ki, Azərbaycan səfirliyinin fəaliyyəti tezliklə bərpa olunacaq”, – deyə İran XİN-in sözçüsü Nasir Kənani əlavə edib.