İranın Ermənistandakı səfiri aranı qarışdırdı | Sərhədlərin dəyişdirilməsinin əleyhinəyik!

“Mövqeyimiz dəyişməyib. Biz sərhədlərin dəyişdirilməsinin, regionda geosiyasi dəyişikliklərin əleyhinəyik. Sərhədlərin dəyişdirilməsi bizim üçün qırmızı xətdir. Bu, İranın ən yüksək hakimiyyət orqanları səviyyəsində elan edilib və heç kim bundan yayına bilməz”.

Bunu İranın Ermənistandakı fövqəladə və səlahiyyətli səfiri Mehdi Sübhani deyib.

Onun sözlərinə görə, başqa ölkənin ərazisində eksterritorial dəhliz yaratmağın mənası yoxdur.

“Hesab edirəm ki, Ermənistan ərazisində eksterritorial dəhliz məsələsinin qaldırılmasının beynəlxalq hüquqa, ölkələrin ərazi bütövlüyünə və milli suverenliyinə heç bir aidiyyəti yoxdur.

Ermənistanın Baş nazirinin “Dünyanın kəsişməsi” proqramında qeyd etdiyi kimi, Ermənistan ərazisində istənilən ərazi əlaqəsi bu ölkənin milli suverenliyi altında fəaliyyət göstərməlidir. Ermənistan ərazisində eksterritorial dəhlizdən danışan dövlətlər öz ərazilərində də eyni dəhlizləri yaratmağa hazırdırlarmı? Məncə, xeyr. Ona görə də özləri üçün istəmədiklərini başqaları üçün istəməməlidirlər”, – deyə M.Sübhani bildirib.

Qeyd edək ki, M.Sübhani tez-tez bənzər açıqlamalar verərək İranın rəsmi mövqeyini İrəvandan dilə gətirməklə Azərbaycan və Türkiyəyə qarşı qəbuledilməz mesajlar verir.