Lukaşenko: Mən bilirdim ki, Nikol gələcək

Müstəqil Dövlətlər Birliyi və Avrasiya İqtisadi İttifaqının Sankt-Peterburqda keçirilən sammitindən öncə Belarus Prezidenti Aleksandr Lukaşenko Ermənistanın Baş naziri Nikol Paşinyanın inciyərək Kollektiv Təhlükəsizlik Müqaviləsi Təşkilatının Minskdə keçirilən toplantısına qatılmaması ilə bağlı sualı cavablandırıb və bildirib ki, Sankt-Peterburq və ya Minsk, heç bir fərqi yoxdur. Əsas odur ki, Paşinyan sammitə qatılmaq üçün Rusiyaya gəlib.

“Mən bilirdim ki, Paşinyan Piterə gələcək, bu barədə şəxsən özü ilə danışmışam. Söhbət zamanı mən ondan soruşdum ki, Sankt-Peterburqa gələcəksən? O, mənə bildirdi ki, bu, tamam başqa bir formatda olan, iqtisadi tədbirdir. Biz hərbi-siyasi mövzuda KTMT-dən incimişik. Bu isə iqtisadiyyata aiddir”, – deyə o bildirib.

Lukaşenko jurnalistlərin Rusiyanın və Belarusun müttəfiq kimi Ermənistanı tərk edib-etməyəcəkləri ilə bağlı sualı da cavablandırıb və deyib ki, bu, baş verərsə, Ermənistan iqtisadi cəhətdən çökəcək. Bu baxımdan da Baş nazir Nikol Paşinyanın buna əl atacağı inandırıcı deyil.

Qeyd edək ki, İkinci Qarabağ müharibəsindəki məğlubiyyətə görə Rusiyanı və KTMT-yə üzv olan ölkələri günahlandıran Nikol Paşinyan uzun zaman idi ki, təşkilatın keçirdiyi görüşlərə qatılmırdı.