Marneulidə Novruz bayramı böyük coşqu ilə qeyd olunur | Prezident və Baş nazir tonqal qaladı

Gürcüstanda soydaşlarımızın kompakt yaşadıqları Marneuli rayonunda Novruz bayramı qeyd olunub.

Bayram şənliyində Gürcüstan Prezidenti Mixeil Kavelaşvili, Baş nazir İrakli Kobaxidze, parlamentin sədri Şalva Papuaşvili, ombudsman Levan İoseliani, barışıq və vətəndaş bərabərliyi üzrə dövlət naziri Tea Axvelidiani, dövlət və hökumət təmsilçiləri, Azərbaycanın və Türkiyənin Gürcüstandakı səfirləri, ictimaiyyət nümayəndələri və yerli sakinlər iştirak ediblər.

Marneulinin mərkəzində Novruz bayramı ilə əlaqədar təşkil olunan guşələr ziyarət edilib, idman yarışları izlənilib, qaliblərə mükafatlar təqdim olunub. Sonra rəsmilər Novruz tonqalını alovlandırıblar.

Novruz bayramı münasibətilə hər kəsi təbrik edən Prezident Mixeil Kavelaşvili əsrlər boyu azərbaycanlıların və gürcülərin bir yerdə yaşadığını bildirib.

Baş nazir İrakli Kobaxidze Azərbaycan xalqına və Novruz bayramını qeyd edən bütün insanlara müraciət edərək onlara sülh və firavanlıq arzulayıb. Hökumət başçısı xristianlarla müsəlmanları, gürcüləri və azərbaycanlıları birləşdirən çoxəsrlik birgəyaşayış, dostluq münasibətilə fəxr etdiyini deyib.

Parlament sədri Şalva Papuaşvili və digər rəsmi şəxslər ölkənin azərbaycanlı icmasını Novruz bayramı münasibətilə təbrik edib, onlara cansağlığı, sülh və tərəqqi arzulayıblar. Tədbir konsert proqramı ilə davam edib.