"Milli valyutamız 2017-ci ilin aprelindən sabitdir, indidən sonra da...” | Prezident - Baku TV

“Bizim maliyyə sistemimiz çox güclüdür. Dövlət borcunun səviyyəsi çox aşağı – 20 faiz nisbətindədir. Xarici borcumuz isə 5,6 faiz təşkil edir. Əslində, istəsək, onu bir gündə sıfırlaya bilərik. Çünki bizim xarici valyuta ehtiyatlarımız xarici borcumuzu 20 dəfə üstələyir”.

Bu sözləri Prezident İlham Əliyev II Azərbaycan Beynəlxalq İnvestisiya Forumu çərçivəsində təşkil olunan “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusuna dair tədbirdə çıxışı zamanı deyib.

Dövlət başçısı Azərbaycanın milli valyutasının məzənnəsinin uzun müddətdir sabit qaldığını bildirib.

“Milli valyutamız 2017-ci ilin aprelindən sabitdir. Onun dollara məzənnəsi dəyişməyib. 2017-ci ilin aprelində bir dollar 1,7 manat idi, indi də belədir və yenə də belə davam edəcək. Ona görə ki, bizim yaxşı ticarət balansımız var”, – deyə Prezident qeyd edib.