NATO Ukrayna Ordusunu gücləndirəcək

“NATO müharibə başlayandan bəri Ukraynaya 150 milyard avrodan çox dəstək verib”.

Bunu Kiyevdə səfərdə olan Alyansın Baş katibi Yens Stoltenberq Ukrayna Prezidenti Volodimir Zelenski ilə birlikdə keçirdiyi mətbuat konfransında deyib.

Onun sözlərinə görə, NATO Ukraynaya daha çox reaktiv təyyarə, tank və zirehli maşın göndərməyi planlaşdırır.

“Biz müharibənin nə vaxt bitəcəyini bilmirik. Amma bilirik ki, Rusiyanın təcavüzü dayandırılmalı olan pis nümunədir. Buna görə də biz Ukrayna Silahlı Qüvvələrini gücləndirməyə davam etməliyik”, – deyə Yens Stoltenberq vurğulayıb.

Ukrayna lideri isə Y.Stoltenberqlə silah tədarükü məsələsini müzakirə etdiyini deyib. O bildirib ki, uzaqmənzilli müasir aviasiya, artilleriya və zirehli texnikaların tədarükünü ləngitmək olmaz.

Qeyd edək ki, bu, müharibə başlayandan bəri Y.Stoltenberqin Ukraynaya ilk səfəridir.