Ölkələrdə inflyasiya üzrə vəziyyət | Azərbaycanın artan geosiyasi rolu | BİZDƏN NƏ DANIŞIRLAR?

“Bizdən nə danışırlar?” verilişinin yeni buraxılışı yayımlanıb.

Verilişdə bildirilib ki, Ermənistanın Baş naziri Nikol Paşinyan sosial şəbəkələrdə canlı yayımda çıxış edərək Azərbaycan benzininin idxalının ölkə daxilində illərlə mövcud olmuş yanacaq monopoliyalarını faktiki olaraq bazardan kənarlaşdırdığını qeyd edib.

Ermənistan nəşri “Arka.am” informasiya agentliyi Baş nazirin açıqlamasına dair xəbəri oxucularının diqqətinə çatdırıb.

N.Paşinyanın sözlərinə görə, artıq indi qonşu ölkədən gətirilən yanacaq hesabına Ermənistan bazarında qiymətlər orta hesabla 15 faiz aşağı düşüb. Baş nazir ticarət əlaqələrinə qarşı çıxanların narahatlığını “yersiz” adlandırıb.

Eyni zamanda Nikol Paşinyan diqqətə çatdırıb ki, Azərbaycanın özündə də əks iddialar səslənir və guya Ermənistan həmin benzinlə tanklarını və digər hərbi texnikasını yanacaqla təmin edəcək.

N.Paşinyan bildirib ki, hər iki tərəfin bu yanaşmaları reallığı əks etdirmir. Onun sözlərinə görə, hazırda tərəflər arasında sülh mövcuddur və bu sülh gələcəkdə “institusional relslərə” oturdulacaq.

Azərbaycan 2025-ci ildə inflyasiya səviyyəsinə görə dünya üzrə 191 ölkə arasında 42-ci yerdə qərarlaşıb. Ölkədə istehlak qiymətlərinin illik artımı isə 5,7 faiz təşkil edib.

Bu barədə “Visual Capitalist” tərəfindən Beynəlxalq Valyuta Fondunun dünya iqtisadiyyatının perspektivlərinə dair oktyabr hesabatı əsasında hazırlanan icmalda qeyd olunub.