Onların ixtiyarı yoxdur ki, ABŞ adından... | QHT sədrləri Azərbaycana qarşı qərəzi şərh etdi

Azərbaycanın qeyri-hökumət təşkilatları Amerika Birləşmiş Ştatlarının 26 konqresmeninə açıq məktub ünvanlayıb.

Buna səbəb konqresmenlərin mayın 13-də Birləşmiş Ştatların Dövlət katibi Entoni Blinkenə və Prezident Cozef Baydenin baş müşaviri Con Podestaya müraciət edərək Azərbaycanın COP29-a sədrliyini əsassız və absurd ittihamlarla qaralamağa cəhd etməsidir.

Vətəndaş cəmiyyətinin fəalları hesab edirlər ki, ABŞ dünyada ətraf mühiti ən çox çirkləndirən ölkələr sırasında olduğu halda bu ölkənin konqresmenlərinin Azərbaycanı məhz bu mövzuda ittiham etməsi qərəz və nifrətin göstəricisidir.

Qeyd edək ki, Birləşmiş Millətlər Təşkilatının İqlim Dəyişmələri üzrə Çərçivə Konvensiyasında yer alan “tarixi məsuliyyət” termini sənayeləşmə başlayandan sonrakı dövrdə ölkələr tərəfindən atılan tullantıların miqdarını nəzərdə tutur və buna görə də hər bir dövlətin tarixi məsuliyyəti müəyyənləşdirilir.

ABŞ-nin karbon emissiyalarının həcminə görə tarixi məsuliyyəti isə 430 milyard tondan çoxdur. Bu da dünyada ən yüksək göstəricidir. Yəni ABŞ-nin konqresmenləri ətraf mühitin təhlükəsizliyini, həqiqətən də düşünürsə, ilk növbədə bu statistikanı nəzərdən keçirsin və ədalətli mövqe ortaya qoysun.