Qərb Gürcüstanda QHT-ləri hansı məqsədlə maliyyələşdirir? | Avropa və ABŞ-nin təlimatı ilə...

Qeyri-Hökumət Təşkilatlarının maliyyələşdirilməsi, onlardan öz maraqları çərçivəsində istifadə, dövlət içində dövlət yaratmaq. Bu metodlar Cənubi Qafqaz və Mərkəzi Asiya regionlarında Qərb dairələrinin son illərdə ən çox istifadə etdiyi üsullardır.

İndi də Gürcüstanda gedən siyasi proseslərin özəyində bu məsələ dayanır. 2019-2024-cü illər ərzində 170 gürcü QHT-si Avropa İttifaqından 46,1 milyon avro maliyyə alıb ki, bu da Gürcüstanın dövlət qurumlarına verilən yardımı 11 dəfə üstələyir.

Hakim "Gürcü Arzusu" Partiyasından bildirilib ki, həmin vəsaitlərin əhəmiyyətli bir hissəsi müxalifət partiyaları ilə əlaqəli təşkilatların dəstəklənməsinə yönəldilir. Ortaya çıxan faktlar maliyyələşmənin şəffaflığı və məqsədləri barədə çox ciddi şübhələr yaradır.

Gürcüstanlı gənclər Qərbin əsas hədəf auditoriyasıdır. Təhsil proqramları və mədəni tədbirlər vasitəsilə gənclərə ənənəvi gürcü dəyərlərinə zidd ideyalar aşılanır.

Bu isə milli kimliyin məhvinə hesablanıb. Demokratiya, liberalizm adı ilə LGBT və ifrat sağçı qüvvələr daha çox ön plana çəkilir. Gürcüstanda “Ailə Dəyərləri və Yeniyetmələrin Qorunması haqqında” Qanunun qüvvəyə minməsinə beynəlxalq təşkilatların sərt etirazı bunun bariz nümunəsidir.

Siyasi analitiklər deyirlər ki, mövcud vəziyyətdən çıxış yolu Gürcüstan xalqının birliyi və qətiyyətindən keçir. Yalnız cəmiyyətin həmrəyliyi bu təzyiqlərə müqavimət göstərə və ölkənin suverenliyini qoruya bilər.