Paris İrəvanı silahlandırmaqda niyə maraqlıdır?

Azərbaycan torpağında həmişə firavan həyat sürən ermənilərin də sonda necə dönük çıxdığını bütün dünya bilir. Eyni mənzərəni Fransanın timsalında da görürük. Bu ölkəyə rəhbərlik edən Emmanuel Makronun da ayağı bu torpaqlara az dəyməyib.

2 il əvvəlki rüsvayçılıqdan sonra öz xalqına söz keçirə bilmədiyini görən Emmanuel Makron, deyəsən, başqa dövlətlərin işinə burnunu soxmaqla başını qatmaq istəyir. Onun erməni “bacılarını” silahla təmin etmək üçün təklif edilən sənədə qol çəkməsi isə bu canfəşanlığın sübutudur.

Deyilənə görə, yaxın vaxtlarda Hindistanın “Trayan” özüyeriyən artilleriya sistemləri Parisin köməyi ilə Ermənistana çatdırılacaq. Sifariş edilən artilleriya qurğularının sayı bilinməsə də, məlumdur ki, E.Makron maliyyələşməni birbaşa üzərinə götürüb. O, özü də bilir ki, sülh danışıqlarının getdiyi ərəfədə Ermənistana silah daşınması regionda yeni hərbi eskalasiyaya yol açır.

Ehtiyatda olan polkovnik Şair Ramaldanov qeyd edib ki, E.Makronun etibarsızlığı xarici siyasətdə artıq özünü göstərir: “İstər Ukrayna fonunda Rusiya ilə gizli danışıqlara getməsi, istərsə də Çinlə körpülər yaratmaq niyyəti diqqətdən yayınmır”.

Bir sözlə, bölgədə guya sülhü dəstəklədiyini bildirərək, əslində, təcavüzkarı silahlandırması Makron administrasiyası üçün heç də yaxşı ad-san vəd etmir. Azərbaycan Prezidentinin də dediyi kimi, “Qarabağ Azərbaycanın daxili məsələsidir”. Yaxşı olardı ki, Qarabağ məsələsinə fransız qalan Müsyö Makron öz xalqının problemlərinə əncam çəksin.