Paşinyan ermənilərə nə söz verdi? | Nikolu Tavuşa aparan səbəb

Ermənistan Baş naziri Nikol Paşinyan Azərbaycanla sərhəddə yerləşən Tavuş rayonunun Əskipara kəndinə gedib.

Onun yerli sakinlərlə görüşünün bəzi təfərrüatları “Hraparak”da yayılıb.

Erməni mətbuatı yazır ki, N.Paşinyanla görüşə yalnız Əskipara kəndinin sakinləri buraxılıb, təhlükəsizlik işçiləri zala daxil olanları yoxlayıb, onların telefonları yığılıb. Bir saat davam edən görüşdə Baş nazir Azərbaycana təhvil veriləcək ərazilərdən danışıb.

N.Paşinyanın sözlərinə görə, Ermənistan-Gürcüstan dövlətlərarası yolun bir hissəsi Azərbaycana məxsus ərazidən, Aşağı Əskipara kəndindən keçir. Baş nazir bu səbəbdən alternativ yolun çəkilməsini təklif edib. O, Azərbaycanla danışıqların hələ də davam etdiyini, ermənilərin tələbini yerinə yetirməyə çalışacağını bildirib.

Görüşdə iştirak edən 2-ci Ordu Korpusunun qərargah komandirinin keçmiş müavini, polkovnik Mihran Maxsudyan deyib ki, erməni sakinlərin Baş nazirdən əsas tələbi Azərbaycan Ordusunun Əskipara kəndinin başında oturmasının qarşısının alınmasıdır.

Laura adlı Əskipara sakini erməni mətbuatına bildirib ki, Nikol Paşinyan onlara deyib ki, Azərbaycanla torpaq mübadiləsi aparılmalıdır.

“Bizim sərhədçilər çayın bu tərəfində, onlarınkı isə o tərəfində olmalıdır. İstədiyimiz bu idi. Baş nazir dedi ki, belə bir razılaşma var. Kəndlilər bundan razı qaldılar. Kilsəmizin o biri tərəfində bizə 100 metrdən çox məsafə qalıb, orada tikanlı məftillər çəkiləcək”, – deyə sakin əlavə edib.

Qeyd edək ki, N.Paşinyanla görüş qapalı keçirilib. İclas iştirakçılarına heç nə çəkməyə icazə verilməyib.