Paşinyan ictimaiyyət qarşısında bizi biabır etdi | Aşotyan

“Nikol Paşinyan getdikcə Ermənistanı Türk dünyasının bir parçasına çevirir”.

Bunu Ermənistanın həbsdə olan müxalifət nümayəndələrindən Armen Aşotyan yeni məqaləsində qeyd edib.

A.Aşotyan Qarabağdan sonra Ermənistanın da Azərbaycan və Türkiyənin daxili məsələsinə çevrildiyini bildirib:

“Baş nazir bu istiqamətdə bütün lazımi işləri görür. O, 4 il əvvəl olduğu kimi, bir daha Münxendə Azərbaycan Prezidenti və beynəlxalq ictimaiyyət qarşısında bizi biabır etdi. Münxendə Olaf Şolts, İlham Əliyev və Nikol Paşinyan arasında görüş olub, daha sonra danışıqlar İ.Əliyev-N.Paşinyan formatında davam edib.

Maraqlıdır, Avropa İttifaqı rəsmisi Ursula fon der Leyen, ABŞ Dövlət katibi Entoni Blinken, Fransa rəsmiləri də Münxendə idilər. Onların vasitəçilik təcrübələri də var. Bəs niyə sözügedən görüşdə iştirak etmədilər? Niyə hər zaman təşəbbüs göstərsələr də, bu dəfə danışıqlara qatılmadılar?”, – A.Aşotyan fikrini yekunlaşdırıb.

Qeyd edək ki, Azərbaycanla Ermənistan arasında birbaşa vasitəçisiz danışıqların əsas təşəbbüskarı Prezident İlham Əliyevdir.