Paşinyandan Azərbaycana ağır ittiham | Nikol nədən qorxur?

Ermənistan və Azərbaycan arasında sülh danışıqlarının aparıldığı bir vaxtda ölkənin Baş naziri Nikol Paşinyan növbəti dəfə təxribat xarakterli açıqlamalar verib.

Hökumət rəhbəri "France24"ə müsahibəsində deyib ki, İrəvanla Bakı arasında sülh hələ mümkün deyil.

Təxribatçı ritorikasına davam edən Paşinyan Azərbaycanın ünvanına çirkin ittihamlar səsləndirməkdən də çəkinməyib. "Azərbaycan Ermənistanı "Qərbi Azərbaycan" hesab edir. Buna son hadisələri də əlavə etsək, sülhün hələlik qeyri-mümkün olduğu bəlli olur. Rəsmi Bakıdan gələn bəyanatları təhlil edərək belə qənaətə gəlirik ki, bəli, Ermənistana hücum ehtimalı çox böyükdür. Azərbaycan Ermənistanın ərazi bütövlüyünü və sərhədlərinin toxunulmazlığını praktiki olaraq tanımır, baxmayaraq ki, diplomatik səviyyədə Azərbaycan əmin edir ki, onun hücum etmək niyyəti yoxdur", – o bildirib.

Absurd iddialarında sərhəd tanımayan Paşinyan Ermənistan silahlı qüvvələrinin ölkəsinin Azərbaycanla şərti sərhədində törətdikləri son təxribatlara belə baxmayaraq, iddia edir ki, rəsmi İrəvanın tək istəyi var, o da qonşu ölkələrlə sülh içində yaşamaq.