Peskov İlham Əliyev və Putinin Düşənbə görüşü barədə nələri açıqladı?

“Rusiya Prezidenti Vladimir Putinlə Azərbaycan Prezidenti İlham Əliyevin görüşünə nikbin yanaşırıq və düşünürük ki, liderlər münasibətlərdə toplanan bütün problemləri müzakirə edə biləcəklər”.

Bunu Kremlin sözçüsü Dmitri Peskov jurnalistlərə açıqlayıb.

O əlavə edib ki, Rusiya Prezidentinin Tacikistana dövlət səfərinin gündəliyi genişdir.

“Rusiya və Azərbaycan prezidentlərinin oktyabrın 9-da görüşəcəyi də razılaşdırılıb. Oktyabrın 7-də hər iki prezidentin telefon danışığı pozitiv və konstruktiv olub. Söhbət zamanı nəzərdə tutulan görüş barədə razılığa gəlinib.

Azərbaycan Prezidenti İlham Əliyev Putinin doğum günündə zəng vurub. Bu telefon danışığı yarımildən çox müddətdə şəxsi təmasların yoxluğundan sonra ilk əlaqə idi”, ‒ deyə Peskov qeyd edib.

O həmçinin bildirib ki, Rusiya və Azərbaycan prezidentlərinin Düşənbədə tamformatlı görüşü nəzərdə tutulub. Bu, 2024-cü ilin oktyabrından bəri ilk görüşdür.

Qeyd edək ki, Şanxay Əməkdaşlıq Təşkilatının sammitində də prezidentlər arasında qısa dialoq olub.