Prezidentin xüsusi nümayəndəsindən vacib açıqlama

Azərbaycan Prezidentinin xüsusi nümayəndəsi Elçin Əmirbəyov “Berliner Zeitung” qəzetinə müsahibə verib.

O, müsahibəsində bildirib ki, Ermənistanla tamamlanmamış, yarımçıq sazişin günü sabah imzalanması təklifi qeyri-real və qəbuledilməzdir.

Tərəflər saziş layihəsinin hələ açıq qalan bir neçə mühüm müddəası ilə bağlı razılığa gəlməlidirlər və onlarsız sənəd natamamdır.

Azərbaycan Prezidentinin nümayəndəsi qeyd edib ki, sülhə nail olmaq yolunda əsas maneə Azərbaycanın beynəlxalq səviyyədə tanınmış suveren ərazisinə Ermənistanın Konstitusiyasında əksini tapmış ərazi iddialarıdır.

İrəvan guya sülh prosesində konstruktiv iştirak etdiyini göstərmək istəyir, əslində isə vaxtı uzadır. Azərbaycanla sülhə nail olmaq artıq onlar üçün prioritet deyil.

Müsahibə əsnasında sualları cavablandıran Elçin Əmirbəyov bildirib ki, Azərbaycan sülh sazişini Baş nazir Nikol Paşinyanla deyil, Ermənistanla imzalamaq istəyir.

Prezidentin nümayəndəsi əlavə edib ki, Bakı hələ də Zəngəzur dəhlizinin açılışına böyük önəm verir.