Qazaxıstan Azərbaycanın döyüş modelini niyə öyrənir? - Hərbi əməkdaşlıq genişlənir - HƏRBİ XRONİKA

“Hərbi xronika”nın budəfəki buraxılışında Bakıda keçirilən qərargah danışıqları fonunda Azərbaycan və Qazaxıstan arasında hərbi əməkdaşlığın yeni mərhələsi təhlil olunub.

Bildirilib ki, 2027-ci il üzrə hərbi əməkdaşlıq planının layihəsinin müzakirəsi Bakı ilə Astana arasında əlaqələrin yalnız protokol xarakterli təmaslardan ibarət olmadığını, praktiki xarakter aldığını göstərir.

Qeyd olunub ki, 2020-ci il Vətən müharibəsi və 2023-cü ildə aparılan antiterror tədbirləri Azərbaycan Ordusunun müasir döyüş təcrübəsini keyfiyyətcə yeni səviyyəyə qaldırıb. Qazaxıstan tərəfi də Azərbaycanın bu praktiki hərbi çözümlərini və idarəetmə mexanizmlərini sistemli şəkildə öyrənməyə xüsusi maraq göstərir.

Bu çərçivədə Qazaxıstan nümayəndə heyətləri Azərbaycan Ordusunun komanda-idarəetmə, kibertəhlükəsizlik, müdafiə planlaşdırılması, hərbi təhsil, NATO standartlarının tətbiqi ilə tanış olublar.

Vurğulanıb ki, Azərbaycan Qazaxıstan üçün artıq təkcə birgə təlim tərəfdaşı deyil, müasir texnoloji və idarəetmə həllərini real döyüş şəraitində sınaqdan çıxarmış praktiki istinad mənbəyidir. Astana bu təcrübəni mexaniki deyil, öz milli təhlükəsizlik və ordu quruculuğu ehtiyaclarına uyğunlaşdıraraq mənimsəyir. 2027-ci il üçün hazırlanan əməkdaşlıq planının məzmunu da məhz bu prosesin nə dərəcədə sistemli xarakter aldığını göstərəcək.