Qərb Ermənistandan yeni Ukrayna yaradır? | Türkiyəli politoloqdan açıqlama

Aprelin 5-də Brüsseldə Ermənistanın Baş naziri Nikol Paşinyan, Amerika Birləşmiş Ştatlarının dövlət katibi Entoni Blinken və Avropa Komissiyasının prezidenti Ursual fon der Leyen arasında Ermənistanın təhlükəsizliyinə dair hərbi paktın imzalanması nəzərdə tutulur.

Düzdür, görüşün məzmunu ilə bağlı verilən açıqlamada iclasın Ermənistandakı islahatlara, onun demokratiyası və iqtisadiyyatına həsr olunması deyilsə də, Bakı ilə İrəvan arasında sülh prosesinin müzakirəsinin nəzərdə tutulmaması, üstəlik, Ermənistanın məhz Avropa İttifaqının müşahidə missiyasının gözü qarşısında təxribata hazırlığı görüşün elə hərbi dəstək müstəvisində müzakirə ediləcəyini istisna etmir.

Bunun da regiondakı konfiqurasiyanı dağıtmağa hesablandığı şübhə doğurmur. Yəni Ermənistan indi də başqa ölkələrin himayəsinə sığınaraq bölgənin təhlükəsizliyini təhdid edir, yeni gərginlik ocağı yaratmağa çalışır.

Görünən odur ki, müdaxilə etdiyi bütün əraziləri qan gölünə çevirən Qərb indi də Ermənistan vasitəsilə Cənubi Qafqazı yeni təhlükə ilə üz-üzə qoymaq istəyir. Ona görə də Qərbin “təhlükəsizlik çətiri”nə sığınan İrəvan ən azından Yaxın Şərqin, Gürcüstanın, Ukraynanın aqibətindən nəticə çıxarmalı, regionun təhlükəsizliyini sual altında qoymamalıdır.