Rusiyanın hərbi bazası Ermənistandan çıxarılır? | Səfirdən sülh açıqlaması

“Rusiya Ermənistanla Azərbaycan arasında sülhün əldə olunmasına maksimum köməklik göstərməyə hazırdır”.

Bu fikirləri ölkənin İrəvandakı səfiri Sergey Kopırkin deyib.

Bildirib ki, Kreml bu istiqamətdə çox fəal, israrlı, ardıcıl işləyib və fəaliyyətini davam etdirir:

“Ölkəmiz bu prosesə maksimum köməklik göstərməyə, Ermənistan və Azərbaycan arasında həqiqətən də dayanıqlı, ədalətli sülh nizamlanmasına nail olmağa sadiqdir. Biz münasibətlərin normallaşması prosesini dəstəkləyirik. Rusiya hər zaman bu istiqamətdə bütün aspektlərdə işləməyə hazır olduğunu vurğulayır, istər sülh sazişinin imzalanması, istərsə də Ermənistanla Azərbaycan arasında sərhədlərin delimitasiyası, demarkasiyası, kommunikasiyaların açılması kimi məsələlərdə işləməyə hazırıq. Rəsmi Moskva bu istiqamətdə fəal işə sadiq olub və sadiq qalacaq. Bu məsələ bizim üçün həyati əhəmiyyət kəsb edir. Cənubi Qafqaz bizim üçün çox mühüm regiondur, bölgənin sabit və firavan olması maraqlarımıza cavab verir”.

Diplomat həmçinin Rusiyanın Ermənistandakı hərbi bazasının çıxarılması ərtafında gəzən söz-söhbətlərə də aydınlıq gətirib:

“Belə siqnallardan xəbərim yoxdur. Mən Ermənistan tərəfdən verilən rəsmi bəyanatları, xüsusən də bazanın çıxarılması məsələsinin gündəmə gətirilmədiyini rəhbər tuturam. Rusiya tərəfdən də belə siqnallar olmayıb”.