Şuşa barədə qalmaqallı iddiaları olan ABŞ səfirindən gözlənilməz addım

ABŞ-nin Azərbaycandakı səfiri Mark Libbi Şuşaya səfər edib. Bu barədə səfirliyin “X” hesabında paylaşım edilib.

Bildirilib ki, səfir Mark Libbi və xanımı Danusia Libbi mayın 6-da Füzuli və Şuşaya səfər ediblər.

“Səfir hökumət nümayəndələri və səfirliyin dəstəklədiyi İngilis dili proqramında iştirak etmiş yerli təhsil işçiləri ilə görüşəcək, həmçinin Şuşa qalasını, Xurşidbanu Natəvanın evini, Xan qızı bulağını, Vaqif məqbərəsini və Cıdır düzünü ziyarət edəcək”, – deyə paylaşımda qeyd olunub.

Qeyd edək ki, Azərbaycanda rəsmi olaraq 2024-cü ilin yanvarından fəaliyyətə başlayan Mark Libbi ölkəmizə gəldiyi gündən müxtəlif regionlara səfər etməklə diqqət çəkib. O, daha əvvəl Bakıdakı Şəhidlər xiyabanından, İçərişəhərdən, Abşerondakı “Yanardağ”dan, Qəbələ və Şəki rayonlarından sosial şəbəkələrdə şəkillər paylaşıb.

Azərbaycanlı sosial şəbəkə istifadəçiləri isə Mark Libbini işğaldan azad olunmuş Qarabağ torpaqlarına – Şuşaya səfər etməyə çağırmışdılar.