Tokayev və Paşinyan mətbuat konfransında nələri müzakirə etdi?
Astana Azərbaycan və Ermənistanın sülh müqaviləsi bağlamaq istəyini alqışlayır.
Bunu İrəvanda səfərdə olan Qazaxıstan Prezidenti Kasım-Jomart Tokayev Ermənistanın Baş naziri Nikol Paşinyanla birgə keçirdiyi mətbuat konfransında deyib.
O, danışıqlar üçün ölkəsinin vasitəçiyini də təklif edib.
“Qazaxıstan mümkün qədər köməklik göstərməyə və danışıqlar üçün platforma təşkil etməyə hazırdır. Əsas məqsədimiz bizimlə dost olan ölkələri bir-birinə daha da yaxınlaşdırmaq və sarsılmaz dostluq münasibətlərinə, sülhə və sabit inkişafa yol açmaqdır. Biz Ermənistanın Cənubi Qafqazda nəqliyyat əlaqələrini gücləndirmək istəyini də yüksək qiymətləndiririk”, – o qeyd edib.
Baş nazir Nikol Paşinyan isə bildirib ki, Ermənistan əvvəllər razılaşdırılmış prinsiplər çərçivəsində Azərbaycanla sülh sazişi imzalamağa hazırdır.