Türk dövlətlərinin təhlükəsizlik orqanları rəhbərlərinin Xankəndi toplantısı

Xankəndidə “Beynəlxalq nəqliyyat xətlərinin təhlükəsizliyinin təmin olunmasında xüsusi xidmət orqanlarının rolu” mövzusunda keçirilən XXVII plenar iclasda Azərbaycan, Türkiyə, Qazaxıstan, Özbəkistan və Qırğızıstanın xidmət rəhbərləri, eləcə də Macarıstandan nümayəndə bir araya gəlib.

Tədbirin açılışında Dövlət Təhlükəsizliyi Xidmətinin (DTX) rəisi general-polkovnik Əli Nağıyev Prezident İlham Əliyevin müraciətini səsləndirib:

“Son zamanlar dünyanın müxtəlif bölgələrində müşahidə olunan qarşıdurmalar beynəlxalq və regional təhlükəsizliyi ciddi şəkildə təhdid edən müxtəlif çağırışların artmasına səbəb olur. Bu mənada ölkələrimizin ərazisindən keçən, Avropa ilə Asiyanı birləşdirən geniş nəqliyyat şəbəkəsinin mühafizə olunması üçün xüsusi xidmət və təhlükəsizlik orqanları arasında əməkdaşlıq əlaqələrinin möhkəmləndirilməsi böyük önəm daşıyır. Nəhəng regional layihələrin icrasına mane olmaq məqsədi daşıyan xarici müdaxilə və sabitliyi pozma cəhdləri də xüsusi qeyd edilməlidir. Məhz buna görə xüsusi xidmət orqanları arasında qarşılıqlı əməkdaşlığın gücləndirilməsi həyati zərurətə çevrilib”.

Əli Nağıyev tranzit marşrutların artan risklər fonunda daha güclü koordinasiyaya ehtiyacının olduğunu bildirib:

“Təhlükəsizlik orqanlarının beynəlxalq nəqliyyat və kommunikasiya xətlərinin dayanıqlı və etibarlı fəaliyyətinin təmin edilməsində həlledici rolu var. Qurumlarımız arasında beynəlxalq terrorçuluq və transmilli mütəşəkkil cinayətkarlıq üzrə məlumat mübadiləsi üçün ikitərəfli və çoxtərəfli formatlarda əməkdaşlıq əlaqələrinin genişləndirilməsi mühüm əhəmiyyət kəsb edir”.

Çıxışlarda terrorçuluq, qaçaqmalçılıq və transmilli mütəşəkkil cinayətkarlığın tranzit xətlərinə yaratdığı təhdidlər xüsusi vurğulanıb. Zəngəzur dəhlizinin reallaşdırılmasına maneçilik cəhdləri də regional təhlükəsizliyə risk kimi qiymətləndirilib.