Türkiyəli nazirdən Zəngəzur dəhlizi ilə bağlı açıqlama

Türkiyənin nəqliyyat və infrastruktur naziri Abdulkadir Uraloğlu ölkəsini türk dünyası ilə birləşdirəcək Zəngəzur dəhlizi layihəsinin 2028-ci ildə həyata keçirilə biləcəyini deyib.

O, bu barədə yerli mediaya müsahibəsində bildirib.

Nazir qeyd edib ki, qarşıdakı 5 ildə dəhlizlə bağlı işlər davam etdiriləcək: “Son vaxtlar bu məsələdə Ermənistandan da müsbət mesajlar var. Dəhlizin 43 kilometrlik hissəsi Ermənistan ərazisindədir. Oradakı işlərin planlaşdırılması da başa çatanda məsələ həllini tapmış olacaq. Beləliklə, biz türk dünyasına daha rahat çata biləcəyik”.

A.Uraloğlu həmçinin diqqətə çatdırıb ki, İran da Zəngəzur dəhlizinə qoşulmaq istəyir.

“Bunun üçün İranla Türkiyə arasında müzakirələr gedir. Bizim üçün Zəngəzur dəhlizi çox vacibdir. İranın bu layihəyə qoşulmasına da kömək edə bilərik. Zəngəzur dəhlizinin Türkiyə tərəfindən 224 kilometrlik hissəsi ilə bağlı addımlar atmışıq. İnşallah, 2028-ci ildə bütün işlər tamamlanacaq”, – deyə nazir əlavə edib.