XİN-dən Paşinyanın müsahibəsinə cavab
Oktyabrın 10-da Ermənistanın Baş naziri Nikol Paşinyanın Birinci Kanala müsahibəsi zamanı Azərbaycana qarşı səsləndirdiyi bir sıra iddialar Ermənistan tərəfinin siyasi manipulyasiyalardan və təhrif olunmuş interpretasiyadan əl çəkmədiyini açıq-aşkar göstərir.
Azərbaycan Xarici İşlər Nazirliyi Baş nazirin televiziyaya açıqlamasını belə şərh edib. Bildirilib ki, Ermənistan Azərbaycanın guya Qranada görüşündə iştirakdan imtina etməsinin səbəbini rəsmi Bakının sülhə hər vəchlə mane olması kimi qələmə verib: “Biz isə Ermənistana ötən ilin dekabrından etibarən heç bir səbəb olmadan müxtəlif platformalarda iştirakdan yayındığı faktlarını xatırladırıq. Azərbaycanın sülh prinsipləri, sülh müqaviləsi, kommunikasiyaların açılması, demarkasiya məsələsində əsas təşəbbüskar tərəf olduğu, bütün platformalarda hər bir vasitəçinin səylərinə daim hörmətlə yanaşdığı hər kəsə məlumdur”.
Ayxan Hacızadə əlavə edib ki, Azərbaycanla Ermənistan arasında münasibətlərin normallaşdırılması, sülh müqaviləsinin imzalanması və Cənubi Qafqazın sülh və əməkdaşlıq məkanına çevrilməsi üçün tarixi şərait yaranan bir dövrdə Baş nazir Nikol Paşinyanın sülh prosesində növbəti dəfə şərtlər irəli sürməsi bu ölkənin tarixdən dərs çıxarmadığını nümayiş etdirir.
![icon](/images/loading.png)