Zaxarovadan Paşinyanın Qarabağ bəyanatına reaksiya
Rusiya Xarici İşlər Nazirliyinin rəsmi nümayəndəsi Mariya Zaxarova Ermənistanın Baş naziri Nikol Paşinyanın “Azərbaycanın ərazisinə Qarabağ da daxildir” bəyanatına münasibət bildirib.
O, mayın 24-də keçirdiyi brifinqdə bildirib ki, bu cür bəyanatlar vermək Ermənistan və onun xalqının səlahiyyətindədir.
“Biz Ermənistan Baş nazirinin bəyanatına 2022-ci ilin oktyabrın 7-də Praqa sammitində tutduqları mövqenin təsdiqi kimi baxırıq. O zaman birgə bəyanat qəbul olunmuşdu və həmin bəyanatda 1991-ci ilin Almatı Bəyannaməsinə istinad var idi. Hansı ki, həmin bəyannamədə keçmiş sovet respublikaları arasındakı inzibati sərhədlər dövlətlərarası sərhədlər kimi tanınır”, – deyə o qeyd edib.
Rusiya XİN sözçüsü vurğulayıb ki, N.Paşinyanın son bəyanatı Ermənistanda birmənalı qarşılanmayıb.
M.Zaxarova həmçinin Azərbaycan və Ermənistan xarici işlər nazirləri arasında Moskvada keçirilən görüşdən söz açıb. Bildirib ki, bu görüş tərəflər arasında bir sıra məsələlər üzrə mövqelərin yaxınlaşmasına kömək etdi.