“4 ildir söz verirlər ki...” | Uşaq futbol klubunda görün hansı şəraitdə oynayırlar - Baku TV

Azərbaycan futboluna onlarla tanınmış oyunçu qazandıran mərhum Əməkdar məşqçi Konstantin Abramenkonun mirası sayılan Gəncədəki “Lokomotiv” Uşaq Futbol Klubu illərdir həllini gözləyən problemlərlə üz-üzə qalıb.

Klubun məşqçi-müəllimləri meydançada sanitar qovşağın və soyunub-geyinmə otaqlarının olmamasından şikayət edirlər.

Onların sözlərinə görə, dörd il əvvəl burada AFFA tərəfindən yeni futbol meydançası inşa olunarkən layihədə nəzərdə tutulan işlər tam şəkildə başa çatdırılmayıb. Bu isə azyaşlı futbolçular üçün bir sıra çətinliklər yaradır.

“Bu layihədə uşaqlar üçün iki paltar dəyişmə otağı olmalı idi. Məşqçilər və valideynlər üçün də otaq planlaşdırılmışdı ki, toplar və digər ləvazimatlar orada saxlanılsın. Dörd ildir söz verirlər ki, tikəcəyik. Uşaqlar qış aylarında burada çətinlik çəkirlər”, – deyə məşqçi Firuz Qulami bildirib.

Məsələ ilə bağlı AFFA-dan bildirilib ki, qurum ölkənin müxtəlif bölgələrində futbol meydançalarının tikintisini həyata keçirir və Gəncədə “Lokomotiv” Uşaq Futbol Klubunun meydançası da təşkilat tərəfindən inşa edilib. Lakin açıqlamada qeyd olunub ki, tikinti zamanı həmin meydança üçün soyunub-geyinmə otaqlarının tikilməsi layihədə nəzərdə tutulmayıb.