Azərbaycan toylarından ən çox qazanan sənətçilər

Azərbaycanda konsert və digər tədbirlərdən ən çox qonorar alan müğənnilər məlum olub.

Araşdırmalar müəyyən edib ki, ölkəmizdə ən çox qonorar alanlar əsasən türkiyəli sənətçilərdir.

Məlum olur ki, Azərbaycan toylarına ən baha qiymətə gələn məşhur türkiyəli müğənni Tarkandır. Meqastarın ölkəmizdə toy mərasimində çıxışı üçün 1 milyon manat tələb olunur. Hələ bu il yanvarın əvvəlində Tarkanın Bakı toylarının birində iştirak edəcəyi və bunun üçün 1 milyon pul tələb olunduğu haqda mətbuatda məlumatlar yayılmışdı.

Bu məsələdə ikinci sırada müğənni Ajda Pekan gəlir. Superstarı toya dəvət etmək istəyən azərbaycanlı ən azı 200 min manatından keçməlidir. Pandemiya dövründə, daha dəqiq desək, 2021-ci ilin iyununda müğənniyə Azərbaycanda məkanların birində səhnəyə çıxması üçün 204 597 manat qonorar təklif olunub, lakin müğənni pandemiya səbəbindən bu təklifi rədd edib.

Məşhur türkiyəli müğənni Murad Boz da Azərbaycana toya gələn sənətçilər sırasındadır. Bu ilin yanvar ayında Bakıda toyda iştirak edən müğənninin azərbaycanlı iş adamından 400 min dollar pul alması haqda Türkiyə mətbuatında məlumatlar yayılıb.

Mustafa Ceceli də tez-tez Azərbaycan toylarında görünür. İddialara görə, müğənninin ölkəmizdəki toyda çıxışı üçün təxminən 100 min manatdan çox qonorar tələb olunur.

Onu da vurğulayaq ki, türkiyəli müğənnilər Azərbaycanda aldıqları qonorarlardan heç bir halda vergi ödəmirlər və bu halın qanun pozuntusu olduğunu ekspertlər də qeyd edirlər.