Böyük Qayıdışın tarixi mərhələsi | Xankəndi və Xocalıya köç başlayır

Böyük Qayıdışa dair I Dövlət Proqramına əsasən, 2024-cü ildə azad olunmuş ərazilərə köçürüləcək keçmiş məcburi köçkünlərin sayı açıqlanıb.

Bu barədə Qaçqınların və Məcburi Köçkünlərin İşləri üzrə Dövlət Komitəsindən məlumat verilib.

Bildirilib ki, hazırda 100-dən çox şəhər və kəndin baş planı təsdiqlənib və bir çox ərazilərdə inşaat işləri aparılır. 2024-cü ilin sonunadək ən azı 20 yaşayış məntəqəsi olmaqla 5 şəhərə və 15 kəndə 20 min keçmiş məcburi köçkünün qayıdışının həyata keçirilməsi planlaşdırılıb. Həmçinin Xocalı şəhəri və rayonun Malıbəyli kəndinə, Xankəndi şəhərinin Kərkicahan qəsəbəsinə həmin yerlərdən məcburi köçkün düşmüş şəxslərin qaytarılması nəzərdə tutulub.

Qeyd edək ki, bu günədək 5 yaşayış məntəqəsinə – Zəngilan rayonunun Ağalı kəndi, Tərtər rayonunun Talış kəndi, Laçın şəhəri və rayonun Zabux kəndi, həmçinin Füzuli şəhərinə keçmiş məcburi köçkünlərin köçürülməsi icra edilib.