Diaspor nümayəndələri işğaldan azad olunmuş ərazilərdə yenidənqurma işləri ilə tanış oldular

Qazaxıstanda fəaliyyət göstərən diasporumuzun rəhbərlərindən və fəallarından, qardaş xalqın təmsilçilərindən ibarət nümayəndə heyəti Azərbaycanda səfərdədir.

Onlar işğaldan azad olunmuş Füzuli və Şuşaya da gediblər. Qonaqlar yolboyu erməni barbarlığının göstəricisi olan dağıdılmış, viran qoyulmuş kəndləri görüb vandalizm aktlarını pisləyiblər.

Onlara rayonda aparılan yenidənqurma, təmir-bərpa işləri haqqında ətraflı məlumat verilib.

Nümayəndə heyətinin ölkəmizə səfərinin şüarına uyğun olaraq “Prezidentlərin izi ilə!” hərəkət edən qonaqlar Füzuli rayonunda Prezident İlham Əliyevin və Qazaxıstan Prezidenti Kasım-Jomart Tokayevin açılışını etdiyi Kurmanqazı adına Uşaq Yaradıcılıq Mərkəzinə gediblər. Mərkəzin 3D modelləşdirmə, səsyazma studiyası, kompüter, musiqi, xalçaçılıq və digər yaradıcılıq otaqları ilə tanış olan qonaqlar uşaqlar üçün yaradılmış imkanları yüksək qiymətləndiriblər.

Daha sonra Şuşaya gedən nümayəndə heyəti “Güllələnmiş heykəllər” abidəsi, Yuxarı Gövhər Ağa məscidi, İsa Bulağı, Vaqifin məqbərəsi, Cıdır Düzü və digər görməli yerləri ziyarət ediblər. Cıdır Düzündə böyükölçülü bayraq açılaraq dalğalandırılıb və xatirə şəkli çəkdirilib.