Gürcüstanın ilk azərbaycanlı qadın yol polisi

21 yaşlı soydaşımız Səbinə Yusubova Gürcüstanda yol polisi kimi fəaliyyətə başlayıb. Bununla da o, Gürcüstanda bu vəzifədə çalışan azərbaycanlı qadın olaraq ilkə imza atıb.

Səbinə babasının arzusunu yerinə yetirmək üçün tibb universtitetinə qəbul olunsa da, ikinci ixtisas haqqında düşünürdü. Bu dəfə polis mayoru olan əmisi Mahir Yusubov ona hüquq fakültəsini seçərək polis olmağı məsləhət görür.

Bundan bir ay sonra dünyasını dəyişən əmisinin tövsiyəsini həyata keçirməyi qarşısına məqsəd qoyan gənc soydaşımız Gürcüstan Daxili İşlər Nazirliyinin elan etdiyi ilk vakansiyaya müraciət edir.

Artıq bir neçə aydır ki, Kvemo Kartli polis idarəsində yeganə azərbaycanlı qadın patrul inspektoru kimi fəaliyyətini uğurla davam etdirən Səbinə Yusubova bugünədək işində hər hansı problemlə qarşılaşmadığını deyir.

Gənc polis soydaşımız “ən yaxın qohumum da olsa, qanun pozuntusuna yol verən heç kimi bağışalamaram” deyir.

Qeyd edək ki, Səbinə Yusubova hazırda Gürcüstan Dövlət Tibb Universitetinin dördüncü, Gürcüstan Texniki Universitetinin hüquq fakültəsinin isə ikinci kurs tələbəsidir.