Naxçıvanda dəhşətli qəzada ölənlərin yaxını danışdı

Naxçıvanda iki minik avtomobili toqquşub, nəticədə 6 nəfər ölüb, 4 nəfər ağır xəsarət alıb. Ağır yol-nəqliyyat hadisəsi Naxçıvanın Kəngərli rayonunda baş verib. Yeni Kərki kəndində Xanlar Sultanovun idarə etdiyi avtomobil Şərur rayon sakini Cəlil Əliyevin idarə etdiyi maşınla toqquşub.

Hadisə zamanı həlak olan Xanlar Sultanov və onun həyat yoldaşı Azadə Sultanovanın qohumu Şöhrət Məmmədov Baku TV-yə danışıb. Onun sözlərinə görə, qəzada həyatını itirən uşağın sünnət toyu olacaqmış: “Uşaqların toyunu edəcəkdik, hazırlıq görürdük. Restoran da kirəyələmişdik. Biri həyatını itirdi, digərinin vəziyyəti isə ağırdır”.

Sultanovlar ailəsinin digər qohumu, 63 yaşlı Sahiyə Cəfərova da həmin vaxt avtomobildə olub və onun da həyatını xilas etmək mümkün olmayıb. Yol qəzasında həyatını itirən digər iki şəxsdən biri – 27 yaşlı Amin Oruclu həkim olub. O, Babək rayonunun Kültəpə kəndində stomatoloq işləyirmiş. 23 yaşlı Hikmət Əlizadə isə Naxçıvan Tibb Kollecinin tələbəsi olub.

Faktla bağlı cinayət işi açılıb, araşdırmalar davam etdirilir.