Qubada 7 nəfərlik şəhid ailəsi qonşunun evində yatır

90 yaşlı Mahur Məhərrəmov Qubanın ucqar dağ kəndi olan Dərkdə yaşayır. İki oğlu – Qoşqar və Eldar Məhərrəmovlar Birinci Qarabağ müharibəsində şəhid olub.

Evləri ötən ay yanaraq külə döndüyündən şəhid ailəsi hazırda çıxılmaz vəziyyətdə qalıb. Belə ki, 7 nəfərlik ailə qonşuda gecələmək məcburiyyətindədir.

Məsələ ilə bağlı Quba Rayon İcra Hakimiyyətindən bildirilib ki, hadisədən sonra Dərk kəndində şəhid ailəsi ilə görüş keçirilib. Ailəyə 2 min manat yardım edilib. Həmçinin ailənin vəziyyəti nəzərə alınaraq evin tikintisi üçün Əmək və Əhalinin Sosial Müdafiəsi Nazirliyinə müraciət olunub.

Nazirliyin tabeliyindəki Sosial Xidmətlər Agentliyindən isə bildirilib ki, imtiyazlı kateqoriyadan olan şəxslər üçün fərdi yaşayış evləri vətəndaşın təqdim etdiyi torpaq sahəsində inşa edilir. Ötən müddət ərzində fərdi yaşayış evinin tikilməsinə görə Mahur Məhərrəmov tərəfindən Nazirliyə torpaq sahəsi təqdim edilməyib.

O ki qaldı şəhid ailəsi üçün hazırkı ərazidə mənzilin tikintisinə, bununla bağlı yaxın günlərdə Agentliyin əməkdaşları əraziyə baxış keçirəcək və yerində qiymətləndirilmə aparıldıqdan sonra müvafiq qərar veriləcək.