"Azərişıq"dan açıqlama | yeni il gecəsi bəzi yerlər işıqsız qalıb

Dekabrın 31-dən yanvarın 1-ə keçən gecə, Yeni il axşamı paytaxtın bəzi yerləri, xüsusən Binəqədi və Abşeron rayonlarının bir çox hissəsi işıqsız qalıb. “Azərişıq” bunun səbəbini açıqlayıb.

Məlum olub ki, quruma məxsus yarımstansiyanın transformatorunun qoruyucusu və beş müxtəlif ərazini elektrik enerjisi ilə təchiz edən 35 kV-luq əsas xətt, həmçinin 6 kV-luq yeraltı kabellərin zədələnməsi nəticəsində Abşeron və Binəqədi rayonlarının bir hissəsinin elektrik enerji təchizatı dayandırılıb.

“Report”un əldə etdiyi məlumata görə, bu, vətəndaşların atdığı fişəng nəticəsində baş verib. Bu səbəbdən 31 dekabr saat 23:55-dən etibarən Abşeron rayonu Mehdiabad qəsəbəsinin və Binəqədi rayonunun Gülüstan qəsəbəsinin bir sıra ətraf küçələrində elektrik enerjisi təchizatı dayanıb.

Hadisədən dərhal sonra əraziyə təmir-bərpa briqadası göndərilib. Gecədən səhər saatlarına qədər görülən işlər nəticəsində üç xəttin fəaliyyəti bərpa edilib. Digər ərazilərdə də elektrik enerjisinin verilməsi bərpa ediləcək.