Talış kəndində yenidən canlanan həyat

Prezident İlham Əliyev martın 18-də Talış-Tapqaraqoyunlu-Qaşaltı sanatoriyası avtomobil yolunun açılışını edib.

4 yaşayış məntəqəsini birləşdirən yeni avtomobil yolunun uzunluğu 22 kilometrdir. Yolun inşası layihəsi çərçivəsində İncəçay üzərində uzunluğu 84 metr olan üçaşırımlı avtomobil körpüsü tikilib.

Talış kəndinə gələn dövlət başçısı burada ikimərtəbəli 78 yerlik məktəb binasının, uşaq bağçasının, inzibati binanın və klub-icma mərkəzinin açılışında iştirak edib. İ.Əliyev qəsəbəyə yeni köçürülmüş sakinlərlə görüşüb, onlarla həmsöhbət olub. Doğma ocağına qayıdan sakinlər yeni tikilmiş evlərdə hər cür şəraitlə təmin olunublar.

Dövlət başçısı Suqovuşan qəsəbəsində salınacaq 5 beşmərtəbəli binanadan ibarət 190 mənzillik yeni yaşayış məhəlləsinin təməlini qoyub, orta məktəbdə yaradılan şəraitlə, daha sonra isə Suqovuşan su anbarının və ondan çıxan magistral su kanalının əsaslı təmiri, su anbarı boyunca yaradılan turizm infrastruktur obyektlərinin tikintisi ilə tanış olub.