Ucarda antisanitar vəziyyətdə yaşayan sakinlərin aqibəti necə olacaq? - Baku TV

Ətrafa üfunət yayan açıq kanalizasiya xətləri illərdir ki, sakinləri narahat edir.

Söhbət Ucar rayonunun Dədə Qorqud küçəsində hökm sürən antisanitar vəziyyətdən gedir.

“35 ildir bu qəsəbədə yaşayıram, 35 ildir bu problemlə üzləşirik. Qonaq gəlir, qoxudan utanırıq. Uşaqlar məktəbə gedib-gəlir, kanalın üstü açıqdır, oynayanda düşürlər. Taksi sürücüsünə deyirsən ki, Dədə Qorquda apar, çoxu gəlmək istəmir”, – sakinlərdən biri şikayətini dilə gətirib.

Başqa bir sakin isə bildirib:

“Bir neçə gün öncə səs-küy eşitdim. Gördüm ki, iki uşaq kanala düşüb. Belə hallar tez-tez baş verir. Burada 190 ailə yaşayır, onların hər birinin evinin çirkab suları bu kanal vasitəsilə axır. Gələn qonaq burnunu tutur, “bura haradır?” deyir”.

Məsələ ilə bağlı Dövlət Su Ehtiyatları Agentliyindən bildirilib ki, qeyd olunan ərazidə Xidmətin mərkəzləşmiş tullantı su şəbəkəsi mövcud deyil:

“Şəbəkə olmayan ərazilərdə qurumun sifarişi ilə təchizatın qurulması məqsədilə müvafiq layihə sənədləri hazırlanıb. Layihələrin icrası şəbəkənin mövcudluğu, texniki vəziyyəti və digər amillər nəzərə alınmaqla həyata keçirilir. Yaşayış məntəqələrində tullantı su şəbəkəsinin inşası tədbirlər planına uyğun olaraq mərhələlərlə aparılır”.

O da qeyd olunub ki, tullantı su şəbəkəsi mövcud olmayan ərazilərdə ətrafda xoşagəlməz qoxu, mənzərə yaratmamaq və mövcud su hövzələrini çirkləndirməmək məqsədilə şəbəkənin qurulacağı müddətə qədər hər bir həyətyanı sahədə fərdi "şambo" və ya septik quyulardan istifadə edilməsi tövsiyə olunur.