Vahid Əhmədova töhmət verildi

Millət vəkili Vahid Əhmədova töhmət verilib.

Belə ki, aprelin 28-də Milli Məclisin İntizam komissiyasının iclası keçirilib. Parlamentin sədri Sahibə Qafarovanın müraciətinə əsasən, iclasda deputat Vahid Əhmədovun son müsahibəsində səsləndirdiyi fikirlərlə əlaqədar məsələyə münasibət bildirilib.

Komissiya sədri Eldar İbrahimov diqqətə çatdırıb ki, Azərbaycan Prezident İlham Əliyevin rəhbərliyi ilə Qoşulmama Hərəkatı kimi nüfuzlu bir beynəlxalq təşkilata sədrlik edən ölkədir. Belə bir ölkənin parlamenti haqqında Vahid Əhmədov kimi təcrübəli bir deputatın səsləndirdiyi fikirlər qəbuledilməzdir.

Komissiya üzvləri isə bildiriblər ki, qanunvericiliyə əsasən, deputatın müsahibə vermək hüququ var və onun bu hüququ məhdudlaşdırıla bilməz. Lakin deputat verdiyi müsahibədə Milli Məclis deputatının etik davranış qaydalarına uyğun olmayan fikirlər söyləməməlidir. Deputat öz imicindən daha çox xalqın və dövlətin mənafeyini düşünməli, nəzərə almalıdır ki, deyilən fikirlər ölkəmizə düşmən münasibət bəsləyən qüvvələr tərəfindən əleyhimizə istifadə oluna bilər.

İclasda deputat Vahid Əhmədov da çıxış edərək məsələyə öz münasibətini açıqlayıb. İclasın sonunda komissiyanın qərarı ilə Milli Məclisin Daxili Nizamnaməsinin 45-ci maddəsinin birinci bəndindinə əsasən deputat Vahid Əhmədov barəsində töhmət intizam tədbiri tətbiq edilib.