Vətən müharibəsinin ilk böyük qələbəsi: Cəbrayıl istiqamətində nələr baş verdi? - QARABAĞ XRONİKASI

“Qarabağ xronikası”nın budəfəki buraxılışında İkinci Qarabağ müharibəsinin ilk həftəsində Cəbrayıl istiqamətində həyata keçirilən əməliyyatların hərbi-strateji əhəmiyyətindən bəhs olunub.

Bildirilib ki, sentyabrın 27-dən başlayan hücum nəticəsində Cəbrayıl-Füzuli istiqamətində illər ərzində qurulmuş çoxpilləli müdafiə sistemi mərhələli şəkildə yarılıb.

Qeyd olunub ki, Böyük Mərcanlı, Nüzgar və digər yaşayış məntəqələrinin azad edilməsindən sonra Azərbaycan Ordusu Cəbrayıl istiqamətində hücumu dərinləşdirib.

Oktyabrın 3-də Mehdili, Çaxırlı, Aşağı Maralyan, Quycaq kəndlərinin azad edilməsi ilə şəhərə hücum üçün əlverişli şərait yaranıb. Həmin gün düşmənin ön mövqelərdəki ikinci və üçüncü taborlarının geri çəkilməsi müdafiənin əvvəlki şəkildə saxlanılmasının mümkün olmadığını göstərib.

Əlavə edilib ki, oktyabrın 4-də Azərbaycan Ordusu 27 ildən sonra Cəbrayıl şəhərinə nəzarəti bərpa edib. Şəhərlə yanaşı, rayonun bir sıra kəndləri də azad olunub və həmin gün axşam saatlarında bu hərbi nəticə rəsmən elan edilib. Cəbrayılın azad edilməsi Vətən müharibəsində azad olunan ilk şəhər və ilk rayon mərkəzi kimi mühüm siyasi və hərbi əhəmiyyət daşıyıb.

Diqqətə çatdırılıb ki, Cəbrayılın azad edilməsi yalnız bir şəhərin geri qaytarılması ilə məhdudlaşmayıb. Bu uğur cənub cəbhəsində yeni əməliyyat imkanları yaradıb, Azərbaycan Ordusuna Hadrut istiqamətində manevri inkişaf etdirmək və Arazboyu qərbə doğru irəliləyişi genişləndirmək imkanı verib.