VI Beynəlxalq Musiqi Festivalı davam edir

“Muğam aləmi” VI Beynəlxalq Musiqi Festivalı davam edir.

Festivalın proqramına müxtəlif ənənəvi və yeni musiqi janrlarından ibarət silsilə konsertlər, beynəlxalq elmi simpozium və musiqi ifaçılarının müsabiqəsi daxil edilib.

İyunun 19-u festival çərçivəsində Daş Salnamə Muzeyində muğam axşamı təşkil olunub. Musiqisevərlər muğam sənətinin təbliğində böyük rolu olan tanınmış və sevilən xanəndələrin təqdimatında muğam aləminə səyahət ediblər.

Tədbirdə Xalq artisti Mənsum İbrahimov, Əməkdar artistlər Təyyar Bayramov, Babək Niftəliyev, Sevinc Sarıyeva, eləcə də Aytən Məhərrəmova, Hüseyn Məlikov, Mirələm Mirələmov “Rast”, “Şur”, “Bayatı-Şiraz”, “Segah”, “Humayun”, “Şüştər”, “Çahargah” muğamlarını ifa ediblər.

Daş Salnamə Muzeyində həmçinin muğam ifaçılarının fotolarından ibarət sərgi də təşkil olunub. Muğam ifaçılarını öz kamerasının lentinə köçürən özbəkistanlı fotoqraf Hüsniddin Ato sənətçilərə sevgisini onların fotoşəkillərini bir araya toplamaqla nümayiş etdirib.

İyunun 19-da festival çərçivəsində Azərbaycan Milli Konservatoriyasında konsert proqramı olub. İranlı Mahan Mirarab gitarada, həmyerlimiz Elçin Şirinov isə pianoda ifa ediblər. Musiqçilərin çıxışı böyük maraqla qarşılanıb. Beynəlxalq Muğam Mərkəzində isə əfqan rübabı və hind sarodunun dünyaşöhrətli ifaçısı Daud Xan Sadozai musiqi ansamblı ilə çıxış edib.

Qeyd edək ki, festival iyunun 25-dək davam edəcək.