Xankəndidə terror törətməyə cəhd edən Avanesyan yenidən hakim qarşısında - Baku TV

Xankəndidə terrorçuluq və digər xüsusilə ağır cinayətlər törətməkdə təqsirləndirilən Karen Avanesyanın barəsində cinayət işi üzrə növbəti məhkəmə istintaqı başa çatıb.

Təxminən 2 saata yaxın davam edən prosesdə hadisə şahidlərindən Elmar Qurbanov ifadə verib. O qeyd edib ki, Avanesyan hadisə vaxtı əlindəki silahla polis əməkdaşları və mülki vətəndaşlara qarşı terror törətmək istəyib.

"Həmin gün Avanesyan əl qumbarası atdı. Daha sonra polis işçilərinə avtomatdan atəş açmağa başladı. Ona xəbərdarlıq etdik, lakin o, silahı yerə qoymadı. Təkcə mənə 8 güllə atdı. 15 dəqiqə fasilə ilə ikinci, daha sonra üçüncü əl qumbarasını atdı. Bu zaman artıq yaralananlar var idi", – deyə Elmar Qurbanov əlavə edib.

Prosesdə daha iki şahid də dindirilib. Onlar hadisə vaxtı Avanesyanın sığınacaqda olmadığını və həmin insdent zamanı oradan qaçdığını bildiriblər.

Ardından məhkəmədə hadisə yerinin ibtidai istintaq zamanı videogörüntüləri göstərilib. Kadrlardan Avanesyanın hadisəni necə törətdiyi görünüb.

Daha sonra dövlət ittihamçısı hakimdən Karen Avanesyanın 18 il azadlıqdan məhrum edilməsini istəyib. Növbəti proses yanvarın 25-nə təyin edilib.

Qeyd edək ki, hadisə nəticəsində 3 nəfər polis əməkdaşı müxtəlif dərəcəli bədən xəsarətləri alıb.