Xankəndidə yaşayan erməni öz millətini ifşa etdi

Sosial şəbəkələrdə Mişa kimi tanınan, bu günə qədər Xankəndidə yaşayan Muşeq Qriqoryan ermənilərin yalanlarını üzə çıxarıb.

Ermənistan mətbuatında Muşeqin Xankəndidə guya azərbaycanlılar tərəfindən əsir saxlanıldığı və işgəncələrə məruz qaldığı deyilir.

Muşeq Qriqoryan isə sosial media hesabında video paylaşaraq deyilənləri təkzib edib və Xankəndidə öz xoşu ilə qaldığını bildirib:

“Mən hazırda Qarabağın Xankəndi şəhərində yaşayıram. Hər şey yaxşıdır, mühafizəsiz rahat şəkildə gəzirəm. Doğrudur, burada hər kəs məni Mişa kimi tanıyır. Bizə yaxşı baxırlar, çox gözəl qidalanırıq. Burada olan bütün azərbaycanlılar mənimlə doğmaları kimi davranırlar. Hər gün Qarabağın ən gözəl guşələrinə məni qonaq çağırırlar.

Bəziləri deyirlər ki, Mişanın əlini, ayağını kəsiblər. Bu, doğru deyil. Baxın, əllərim, ayaqlarım yerindədir. Xankəndinin içində rahat şəkildə gəzirəm, heç kim mühafizə etmir məni. Sadəcə olaraq buradan başqa bir şəhərə getmək istəyəndə, sərhəd-buraxılış məntəqəsindən çıxanda məni müşayiət edirlər. Ermənilər və azərbaycanlılar, sizə səslənirəm, bir-birinizlə mehriban davranın, sevin bir-birinizi”.