Xankəndiyə qayıdışın bir addımlığında

Azərbaycan, Rusiya və Ermənistan arasında imzalanmış üçtərəfli bəyanatın 7-ci maddəsinə əsasən, ölkədaxili məcburi köçkünlər və qaçqınlar BMT-nin Qaçqınlar üzrə Ali Komissarlığının Ofisinin nəzarəti altında Qarabağ ərazisinə, eləcə də ətraf rayonlara geri qayıtmalıdırlar. Lakin üç il vaxt keçməsinə baxmayaraq, hələ də Qarabağ iqtisadi rayonuna məcburi köçkünlərin geri qayıtması prosesi baş tutmayıb.

Beynəlxalq Miqrasiya Təşkilatından bildirilib ki, qurum keçmiş məcburi köçkünlərin işğaldan azad edilən ərazilərə qayıtmasında Azərbaycana dəstək olmaq üçün lazımi təcrübəyə malikdir.

Azərbaycanın mövqeyi bundan ibarətdir ki, üçtərəfli bəyanatın müddəaları yerinə yetirilməli və münaqişəyə qədərki demoqrafik balans bərpa olunmalıdır. Martın 1-də Azərbaycan nümayəndə heyətinin erməni sakinlərlə görüşməsi də ilkin təmas olaraq və bu prosesin tezləşməsi baxımından mühüm addım hesab edilə bilər.