"Xəstəliyə görə evi satdı, amma..." | Böyrək xəstəliyindən əziyyət çəkən İlkin kömək gözləyir

“Arzunun vaxtı” verilişinin budəfəki buraxılışının qonağı polikistoz böyrək xəstəliyindən əziyyət çəkən 33 yaşlı İlkin Məmmədli olub.

 Onun sözlərinə görə, atasından irsən keçən xəstəliyin ilk əlamətləri hərbi xidmətdə olarkən üzə çıxıb. Buna baxmayaraq, ailəsini dolandırmaq üçün uzun müddət ağır işlərdə çalışıb. Lakin zaman keçdikcə səhhəti daha da pisləşib.

İlkin bildirib ki, vəziyyəti ağırlaşdıqca tez-tez ağrıkəsicilərdən istifadə etməli olub.

“Vəziyyətim o qədər pisləşmişdi ki, ağrıkəsiciləri hər üç gündən bir vurdururdum. Bir gün yuxudan duranda gözlərim tutulmuşdu, heç nə görmürdüm. İndi görmə qabiliyyətim cəmi 1 faizdir”, – deyə o qeyd edib.

Maddi çətinliklərlə də üzləşən İlkin həyat yoldaşı və iki yaşlı qızı ilə birlikdə kirayədə yaşayır. Ailənin kirayə xərclərini isə xadimə işləyən anası qarşılayır.

O, atasının da eyni xəstəlikdən əziyyət çəkdiyini və bu səbəbdən onu erkən yaşda itirdiyini bildirib.

İlkin ən böyük arzusunun sağalaraq yenidən işləmək və qızını böyütmək olduğunu deyib:

 “İstəmirəm mənim yaşadığımı qızım da yaşasın. Atamın bu xəstəlikdən necə əziyyət çəkdiyini görmüşəm. Mən, sadəcə, sağalmaq, işləmək, ailəmə baxmaq, uşağımın əlindən tutub məktəbə aparmaq istəyirəm”.