Xocalıdakı Fərrux qələbəmizdən bir il keçdi

Martın 24-ü Azərbaycan Ordusunun Fərrux kəndi və ətraf yüksəkliklərdə keçirdiyi hərbi əməliyyatdan bir il ötür.

Fərrux əməliyyatı Xocalı rayonunun Fərrux kəndi, Fərrux dağı, “Daşbaşı” yüksəkliyi və “Sağsağan” dağ silsiləsinin azad olunması üçün Azərbaycan tərəfindən aparılmış əməliyyatdır.

Ötən il martın 24-də başlayan hərbi əməliyyatlar 4 gün davam edərək martın 28-də yekunlaşıb. Səhər saatlarında dumanlı hava və məhdudgörmə şəraitindən istifadə edən qeyri-qanuni erməni silahlı dəstələrinin üzvləri Azərbaycan Ordusunun bölmələrinə qarşı təxribat törətməyə cəhd göstərib. Dərhal görülən tədbirlər nəticəsində qeyri-qanuni erməni silahlı dəstələrinin üzvləri geri çəkilməyə məcbur edilib.

Əməliyyat nəticəsində Azərbaycan Ordusu ilk növbədə Xaçınçayın mənsəbini və ən böyük şirin su anbarını işğaldan azad edib. Bununla da Ağdam rayonunun bir çox ətraf yaşayış məntəqələrini və geniş əkin sahələrini təmin etməyə qadir Xaçınçay su anbarını mühafizə altına alıb.

Əməliyyatdan sonra Ağdam şəhəri və rayonun 9 kəndi Qarabağ iqtisadi rayonunda yerləşən erməni separatçılarının vizual nəzarətindən çıxıb, Xankəndi-Ağdərə avtomobil yoluna Azərbaycan Silahlı Qüvvələrinin vizual nəzarəti təmin edilib.

Həmçinin Fərrux dağında Azərbaycan Silahlı Qüvvələrinin nəzarəti əldə etməsi Xocalı rayonunun Pirlər kəndinə də tam nəzarət imkanları yaradır.