ABŞ İrana mesajı belə verdi | Seçəcəyimiz vaxtda sizi ağır nəticələr gözləyir!

Yəmənin “Ənsar Allah” üsyançı hərəkatının üzvü olan husilər Ərəb dənizində ABŞ-nin “Carl Vinson” təyyarədaşıyan gəmisinə hücum edib.

Bu barədə husilərin hərbi sözçüsü Yəhya Sariya “Al Masirah” telekanalında çıxışı zamanı bildirib.

O həmçinin iddia edib ki, ABŞ-yə məxsus “F-18” qırıcı təyyarəsi üsyançıların “Harry Truman” gəmisinə endirdiyi zərbə nəticəsində qəzaya uğrayıb.

Daha əvvəl CNN məlumat verib ki, husilərin hücumu nəticəsində “F/A-18E Super Hornet” döyüş təyyarəsi gəmi kəskin yayınma manevri edərkən göyərtədən yerə çırpılıb. Hadisə nəticəsində bir ekipaj üzvü yüngül xəsarət alıb.

Baş verənlərin fonunda Pentaqon İranı husilərə dəstəyinə görə hədələyib. Belə ki, ABŞ müdafiə naziri Pit Heqsetin “X” hesabındakı paylaşımında vurğulanıb ki, ABŞ Tehranın üsyançılara göstərdiyi ölümcül dəstək haqqında dəqiq məlumatlara malikdir.

“İrana mesaj: Biz husilərə göstərdiyiniz ölümcül dəstəyi görürük, tam olaraq nə ilə məşğul olduğunuzu bilirik. Siz də ABŞ Silahlı Qüvvələrinin nəyə qadir olduğundan xəbərdarsınız. Bizim seçəcəyimiz vaxtda və yerdə sizin üçün ağır nəticələr olacaq”, − deyə o qeyd edib.