ABŞ məsələyə qarışdı | Netanyahu və Bayden arasında gərgin söhbət

Qəzza ilə müharibənin və İranla gözlənilən potensial hücumların fonunda, İsrail-Livan sərhədində də vəziyyət ürəkaçan deyil.

Yerli medianın yaydığı məlumata görə, İsrail ordusu İordan çayının qərb sahilindəki Nablus şəhərinə daxil olub.

“Hizbullah” hərbi qruplaşması da İsrailin şimalına dronlarla havadan zərbələr endirib. Hücum nəticəsində ölən və yaralananların sayı hələ ki açıqlanmayıb.

Təl-Əviv isə buna cavab olaraq Livanın cənubundakı Kafr Kila kəndinə hücum edib. Nəticədə çox sayda itkinin olduğu bildirilib.

İsrail-Livan münaqişəsi çərçivəsində rəsmi Vaşinqton da məsələyə qarışıb. ABŞ Prezidenti Cozef Bayden İsrailin Baş naziri Benyamin Netanyahu ilə telefon danışığı zamanı onunla qeyri-diplomatik üslubda söhbət edib.

Bildirilib ki, o, Netanyahudan Qəzza zolağında gedən müharibə barəsində boş-boş danışmağı dayandırmasını tələb edib. Baş nazir isə HƏMAS ilə əsir mübadiləsi istiqamətində danışıqların uğurlu olduğunu və yeni nümayəndə heyətinin göndəriləcəyini açıqlayıb.

Yerli medianın yaydığı məlumata görə, İsrail lideri ABŞ-yə qarşı nankorluq edir və Qəzza zolağında girovların vəziyyəti ilə bağlı onlara yalan danışıb. “Bəsdir, məni lağa qoydun” deyən Bayden daha sonra Netanyahuya Tehranda keçirilən əməliyyatın regionda daha geniş müharibəyə səbəb ola biləcəyini deyib. Baş nazir isə danışıqlara mane olan tərəfin İsrail olduğunu inkar edərək, günahı HƏMAS-ın üzərinə qoyub.