ABŞ-nin şərtləri Avropanın canına qorxu saldı | “Köhnə qitə”nin taleyi sual altındadır

Çin ticarət tarifləri ilə bağlı ABŞ ilə danışıqlara hazırdır. Lakin rəsmi Pekin əvvəlcə ABŞ Prezidenti Donald Tramp Administrasiyasından daha çox ehtiram görmək istəyir.

Bu barədə “Bloomberg” məlumat yayıb.

Bu şərt D.Tramp Administrasiyası tərəfindən Çin haqqında aşağılayıcı ifadələrin azaldılmasını nəzərdə tutur. D.Trampın sərt bəyanatları onun da Çin barədə eyni fikirdə olduğu təəssüratını yaradır.

Pekindən verilən açıqlamadan aydın olur ki, Çin rəhbərliyi D.Trampdan konkret addımlar gözləyir. Əsas şərt isə artırılmış rüsumların aşağı salınması və ticarət savaşının yekunlaşdırılmasıdır. Sadəcə Vaşinqtonun da bununla bağlı öz şərtləri var.

Belə ki, Çin ABŞ-nin qonşuları və Avropa ilə ticarət aktivliyini azaltmalıdır. Bu isə ABŞ ilə qonşu olan ölkələr üçün yaxşı heç nə vəd etmir. Kanada, Meksika və Panama son zamanlar Çin ilə sıx iqtisadi əlaqələr qurub. Bu onların ABŞ-dən müstəqil güclü iqtisadi sistem qurmasına zəmin yaradır. Hər üç dövlət Çinin dəstəyi olmadan D.Trampın təzyiqləri qarşısında ayaq üstə qala bilməzdi.

Nəzərə almaq lazımdır ki, D.Trampın öz qonşuları, xüsusilə də Kanadaya qarşı çox ciddi ərazi iddiaları var. Çinlə iqtisadi razılaşma Avropanın da iqtisadi tənəzzülünün başlanğıcı ola bilər. Avropa İttifaqı da vəziyyətin yaxşı heç nə vəd etmədiyini görür və ABŞ-yə qarşı cavab tədbirləri hazırlayır.

İspaniya Baş naziri Pedro Sançesin Çinə səfəri və əməkdaşlıq əlaqələrinin genişləndirilməsi barədə apardığı danışıqlar da sığorta xarakterlidir. Çünki o, Si Cinpini məlumatlandırıb ki, Avropa İttifaqı da Çinlə əməkdaşlığı gücləndirmək niyyətindədir.

Almaniya da Çinlə əlaqələri genişləndirib. Amma Çin ABŞ ilə ortaq məxrəcə gələ bilsə, köhnə qitə çətin vəziyyətdə qalacaq. Daha dəqiq desək, Avropanın ABŞ-dən asılılığı artacaq.