Almaniya Kansleri və NATO lideri görüşdü

“Dekabrın 13-ü və 14-də ABŞ rəsmiləri ilə Avropa tərəfinin irəli sürdüyü Ukraynada sülh təklifləri ilə bağlı danışıqlar aparmağı gözləyirik”.

Bunu Almaniya Kansleri Fridrix Merts bildirib.

“Ümumi məqsədlərə nail olmaq üçün qəti şəkildə Ukraynanın tərəfində dayanırıq. Bu işi irəli aparmaq üçün Moskvaya təzyiqi artırmağa davam edəcəyik. Nəhayət, “kölgə donanması”na qarşı da daha sərt tədbirlər görəcəyik. Eyni zamanda Ukraynaya genişmiqyaslı dəstək verməyə davam edəcəyik. Hər şeydən əvvəl Rusiyanın dondurulmuş aktivlərindən istifadə edərək Ukraynanın gələcək hücumlara qarşı effektli şəkildə özünü müdafiə edə bilməsini təmin etmək istəyirik”, – deyə o vurğulayıb.

F.Mertsin sözlərinə görə, dekabrın 9-da ABŞ Prezidenti Donald Trampa dekabrın 13-ü və 14-də Amerika hökuməti ilə sənədlərin birlikdə yekunlaşdırılması təklifi verilib. Ağ Ev Kiyevin tezliklə sülh əldə etməsi üçün təzyiq göstərir, lakin Avropa liderləri keçən ay ABŞ tərəfindən dəstəklənən və bir çoxlarının Moskva üçün əlverişli hesab etdiyi plana qarşı çıxır.