Dünyanı lərzəyə salan Çin silahları | Pekindəki hərbi paradda güc nümayişi

Pekində parad keçirilib. Paradda ilk dəfə Çinin strateji nüvə triadasını təmsil edən raketlər nümayiş olunub.

Parad zamanı uzaqmənzilli aviasiya raketi "JL-1", sualtı bazalı qitələrarası raket "JL-3", eləcə də quru bazalı qitələrarası raketlər "DF-61" və "DF-31" təqdim olunub.

Bundan başqa, qitələrarası raket olan "DF-5C" də nümayiş etdirilib. Bu, 1970-ci illərdən bəri inkişaf etdirilən raket proqramının ən son versiyasıdır.

Raket maye yanacaqla işləyir və bir hədəfə qarşı çoxsaylı, müstəqil idarə olunan döyüş başlıqları buraxa bilir. Raket 20 min kilometr məsafədə istənilən hədəfi vurmağa qadirdir.

Beləliklə, Çin ilk dəfə olaraq dənizdən, qurudan və havadan buraxıla bilən nüvə başlıqlı raketlərini birlikdə sərgiləyib. Bu, ölkənin nüvə silahlarının "üçlü" daşıma qabiliyyətini göstərən ilk hadisə olub.

Bu silahlar Çinin "suverenliyini və ləyaqətini qoruyan əsas strateji qüvvə" hesab olunur.

Paradda ABŞ-nin aviadaşıyıcı gəmilərinin maketlərinə qarşı sınaqdan keçirilmiş hipersəs sürətli gəmivuran raketlər də nümayiş olunub. Bunlara "Yingji-19", "Yingji-17" və "Yingji-20" daxildir.

Çin həm sualtı, həm də havada fəaliyyət göstərə bilən pilotsuz aparatları da nümayiş etdirib. Söhbət kəşfiyyat və zərbələr üçün istifadə oluna bilən dronlardan gedir. Həmçinin gəmilərdən buraxıla bilən pilotsuz helikopterlər də təqdim olunub.